Carman 與 Mini 的故事
狗狗怎樣進入你嘅生命？
有好多人問過Mini喺邊度買，其實Mini係2021年5月喺LAP領養㗎。當時好有緣份遇到Mini, 當日喺領養中心，其實唔係預約睇Mini㗎，佢都仲未有領養post!
但我臨走時，聽到Mini吠咗差唔多15分鐘，呢個吠聲，我覺得好似我以前嘅狗狗，所以問中心職員。好幸運地見到佢之後唔夠28個鐘就接左佢成為我哋屋企一份子！我哋其實當時屋企咩用品都未準備！
當時佢好瘦，得1.9kg，毛毛打哂結，皮膚唔係幾好，仲有啲咳添！睇咗差唔多3個月醫生！不過只要你俾啲耐心同愛去照顧佢，佢都會變得好健康、好可愛㗎！(當然喺媽媽眼中，佢幾時都咁可愛😆)
Kitty 與 魔芝 的故事
你和狗狗最難忘嘅經歷？
魔芝讓我認識到一大班好朋友，見識另一個世界！
Meipo 與 爸爸 的故事
你和狗狗怎樣說再見？
因為疫情，我哋開始選擇在村郊生活。2020年3月8日，跟地產嚟睇地嗰日第一次遇到爸爸，爸爸係一群村浪嘅嘅家族領袖。地產話呢群村浪掘地窿到我們準備租嘅農舍後生仔，如果唔鐘意可以將個窿封咗佢。因為無封咗個窿，就係咁開始同呢個族群一齊生活。
由第一天所見嘅七隻、四隻、到八隻、十一隻、十三隻…...佢哋都係同一個媽媽生嘅，兩年幾以嚟，我哋一直見證呢個族群成員嘅進出，亦盡量為佢哋提供合適嘅照顧，同為新出世嘅安排絕育。
20年聖誕期間，大約距離爸爸離開前半個月。嗰段日子好冷，就算有幫佢哋著衫都抵唔住山邊嘅嚴寒，到了21年1月10日，嗰晚，爸爸開始唔肯食嘢，問過專業人士，知道爸爸可能係感染狗瘟，脱緊水，已經到咗命危嘅地步，我哋即刻將佢同其佢家族成員隔離，避免交叉感染。爸爸係族群領袖，亦有相伴一生嘅愛人－媽媽同佢六個仔女，佢哋響最後嘅時光需要彼此被隔離，感到特別嘅遺憾。
嗰晚我哋一齊陪住爸爸，響農舍入面，窗前面點咗蠟燭，摸住爸爸，同佢傾偈，
同佢講：如果太辛苦，就放心安心上路、唔駛牽掛呀......爸爸當時意識特別清醒，都聽得明我哋講咩，直到清晨四點左右，長呼咗七口氣之後，爸爸嘅魂就完全離開咗身體。
無時間處理悲傷，就要搵合適嘅寵物善終公司安排處理爸爸嘅遺體。
就係咁，就同相處咗十個多月嘅爸爸講再見嘞。慶幸嘅係，浪浪一生嘅爸爸，最後可以響室內，帶著愛同祝福離開。
Phoebe 與 Dovy 的故事
狗狗怎樣進入你嘅生命？
之前隻狗狗突然間過咗身，有一日夢見佢同另一隻白色狗狗係到跑草地，之後就努力搵一隻返黎陪自己，咁岩就係嗰個時候見到Dovy 呢隻超鍾意跑嘅白色狗狗
Cloris 與 Cube 的故事
你和狗狗最難忘嘅經歷？
偶然一次機會下遇上這小傢伙後不久…
媽媽發生了車禍…
在醫院臥床嘅時候,
係這小傢伙令媽媽有動力地一步一步站起來…
不斷告訴自己要因為Cube要努力康復…
生命影響生命…
毛孩係我嘅動力
Gionne 與 Cash 的故事
狗狗怎樣進入你嘅生命？
Cash在2009年一個8號暴風球嘅晚上，俾人裝咗入一個膠袋度遺棄左係垃圾站。第二日個膠袋已經裝滿水。我放學時同我媽咪係垃圾站執起左佢帶佢去睇醫生。
Mi 與 Moji 的故事
狗狗怎樣進入你嘅生命？
01.05.2020你出生
第一次見你：06.05.2020（選擇你當我們兒子嘅那天）
第二次見面：28.05.2020
第三次見面：17.06.2020
帶你回家日：04.07.2020
⭐出生第六日即：06.05.2020
我們第一次見面，選了你之後，把你放在手心上拍照，你已經對住媽Mi嘅鏡頭笑笑，真係好奇妙！你名字👉🏻《表情王MOJI🙂😀😏🥴》就係這樣來嘅（本身想叫Emoji，怕三個音你會難記，所以叫你Moji）
在等候帶你回家嘅那段日子，真的十分煎熬，然而在回家後也要努力再努力學習，才可以給你最好嘅照顧
從你未張開眼睛我們已經選擇了你，這係媽Mi這輩子做得最對嘅事，一件件嘅小事加起來，令媽Mi知道我們能夠遇上彼此都係因為「緣份」二字，還要係很深很深很深嘅「緣份」
從一開始會怕仼何狗，不懂得與你如何相處，什至有點恐懼，到現在每一刻都想親你抱你被你黏着，真係很大改變，你什至令媽Mi不害怕流浪狗，會關愛流浪狗，會救貓狗，變成一個更好更好嘅人。你，真的功不可末！
你亦將原本有遺憾嘅事情變成沒有太多嘅遺憾，你陪著媽Mi去探望爺爺，然而在之後那天，爺爺便過身，你第一次和爺爺見面亦係最後一次見面，當天嘅你很乖巧，沒有吠也沒有吵鬧，什至在爺爺家嘅地板上舒服地睡著，亦吃了爺爺親手餵嘅零食和聽了爺爺嘅訓話，媽Mi看在眼內真嘅覺得好幸福
你也圓了媽Mi小小嘅心願，能夠把你逐一帶到所有還健在嘅老長輩家中見面，今天深夜在媽Mi打這篇文章嘅時候，正有一位老長輩靜悄悄嘅離開了……
生命無常 -- 媽Mi亦一早把你第一次在家中對住媽Mi笑笑嘅樣子狠狠地刺在身上，亦和你去補影結婚照（因結婚嘅時候還沒有你在），未來嘅日子不知道會怎樣，只知道媽Mi永遠都會保護你疼你愛你，陪著你走每一步
現在，媽Mi發現，每次外出，有分離焦慮症嘅應該係媽Mi而不係你。每秒發生嘅事情都係何等珍貴，每個時刻都值得記住，無論世界怎變，我們愛你嘅心都不會變。一言一語一字真的表達不到所有。很歡迎你繼續黏着媽Mi，臉上繼續掛著令佢人看了都會笑嘅臉，繼續搞怪，一起幸福下去。就算有一天你老了你要離開，媽Mi嘅心中也一直會有你嘅位置，永遠愛你
愛你愛到無法自拔嘅媽Mi字
