本身養開細狗仔，喺2017年屋企所有狗仔相繼百年。聯絡剛認識嘅義工朋友，我話我有地方可以暫養小動物。義工朋友即時send相比我,，每次當我覆佢話可以時，佢都同我講岩岩有人要左啦！嗰一刻我諗，可能我同佢地無緣掛。

直到有一日義工朋友又再send message比我，佢話：我地岩岩救咗隻唐狗，請問你可以幫手暫托嗎? 但呢隻唐狗有啲特別，因為佢得三隻腳，照顧可能要比較有耐性，我嗰一刻有諗過，唔係掛！諗住屋企狗狗走得7788，想搵D小朋友或者年紀輕輕養下輕鬆下心情，而家一係唔托，一托就托隻7歲大三腳唐狗。同埋我又未養過大狗，嗰一刻真係有十五十六過。

義工姐姐同我地講，佢係喺AFCD捉狗隊捉返黎，好彩佢有晶片，如果唔係應該已經啪咗！佢地都唔知佢身世，只係知佢晶片個聯絡人係佢BB時嘅前主人，之後前主人因各種原因俾返當時嘅義工團體，但聽講個義工團體已經消聲匿跡了。同先生商量後，如果我哋都唔暫托佢，可能未必有人想照顧一隻三腳狗，再睇埋佢張相，一副好可憐好慘嘅樣，之後就無再猶豫即刻應承義工姐姐。

相中嘅她，就係2018年1月6日佢第一日嚟我家，佢嚟我哋入屋前，我哋已經準備咗間房俾佢安頓，因為佢三隻腳嘅關係，我哋特別買咗大坐墊俾佢。義工姐姐放低咗佢，同我講等佢自己適應下環境先。義工離開後，我時不時入去望下佢，佢都係捲縮起一嚿不斷不斷震！嗰一刻見佢咁真係好心痛。阿女，你究竟之前經歷過啲咩事？喺呢度你唔洗再驚㗎啦！無人會傷害你。

佢第一次見我先生時，比起見到我仲躲得嚴重，震過貓王！我哋諗佢無咗隻前腳會唔會係以前比男人虐打過？我先生都不其然好心疼呢位小朋友。所以佢每日一收工就會入去間房同佢一齊坐，打機，食野，玩電話，煲劇都喺間房陪佢，等佢熟悉我先生氣味同埋話佢知無人會傷害佢。

我哋暫養咗大約3個月，佢已經唔再怕我哋同埋開始同我哋玩，我哋同佢培養咗好好嘅感情。我先生有提議不如領養，因為覺得佢實在有太多唔好嘅經歷，如果要佢再去另一個新家庭，佢又要重新適應。對佢嚟講係好大嘅心理傷害。其實喺先生未提出我已經有咁諗過，會覺得未必其他人了解點去照顧一隻三腳狗。喺2018年嘅4月頭，我就同義工姐姐講，你唔洗再出post搵人要啦！佢已經有一個好好嘅安落渡餘生啦！

佢叫做糖糖！今年大約11歲！而家已經係一隻活潑可愛，好懂事，好保護家人，有時會耍脾氣嘅女孩子!！希望大家睇完我呢篇文章後，可以比個機會唐狗，甚至一啲有缺陷嘅小動物，相信你所付出嘅愛，佢哋係會感受到嘅！